• slide
  • slide
  • slide
  • slide
  • slide
  • slide
  • slide
  • slide

Der gross Tag

Samstig, 22. August 2015

Der Tag het fürd Rebecca scho früech agfange. Coiffeurtermin! Am 8i… Gähn.

När natürlech aalege u parat mache für di ersti Begägnig.

Die het sech Ändu hert müesse erschwitze. Är isch amne ganz bsundere Ort häre gfüehrt worde – ufd Wylerhöchi z Aumedinge – dert, wo sech di zwöi verlobt hei.

När het sech z Brutpaar zum erste Mau gseh. Das si no chli meh Zyt hei, für sech anenang z gwane i dene spezielle Chleider, hei si no grad e stündegi Kutschefahrt düre Schorewald dörfe mache.

När isches im Schadaupark wytergange mit fötele. Uf der Wiese, uf der Muur, sogar voremne Rettigsring hei si posiert. U d Rebecca het derby no grad e Rose im See versänkt…

Der nächst Termin hei di zwöi ir Chiuche gha. Vorher hets no chli Teigwaresalat gäh, das ds Brutpaar nid grad vo de Stüel gheit. Ändu isch när ga d Gäst begrüesse, u d Rebecca het sech mit ihrem Vater no chli versteckt.

Der gross Momänt isch cho. D Glogge si verstummt, der Hochzytsmarsch ertönt. D Brut erschiint mit ihrem Vater, aui stöh uf. Aui Blicke si uf se grichtet – natürlech o die vom Ändu. Är het sini Brut ganz vorne erwartet, u de o ändlech dörfe i Empfang näh.

Der Pfarrer het viu verzeut, über Liebi, Beziehige, u was das fürne Kampf cha si. U wi guet das mirs doch hei, das mir die Ehe unger Gottes Schutz dörfe steue. Bi de Eheverspräche si du nid ganz aui Ouge troche blibe. Di zwöi hei nomau betont, das si die grossi u schöni Useforderig mit Gottes Hiuf wei wage.

Natürlech het der Kuss nid dörfe fähle. E Bible hei si o übercho, u när si d Lüt scho langsam richtig Usgang marschiert. Es wunderbars Spalier het das gäh! Rose, Seifeblatere, u natürlech luti Glückwünsch hei ds Ehepaar eskortiert.

Bi de Föteli het sech du d Rebecca no chli roti Schultere ghout, aber das het vor luter Fröid u Lache o niemmer gmerkt. Imne wunderbar bequeme Cadillac si d Brutlüt när zum Apero uf Schwande chauffiert worde. Gässe hei si nid so viu, derfür chli öppis trunke u ganz viu Häng gschüttlet, glachet u sech a au dene Lüt gfröit.

Der Chauffeur het när mitemne Chevrolet uf se gwartet, u isch mit dene zwöi via Interlake ufd Meielisalp düset. Dert het me sech grad gfragt, öb itz di ungergehendi Sunne oder di zwöi früsch Verhüratete meh strahle. Uf au Fäu hei aui Gescht e wunderbari Ussicht dörfe gniesse.

Ds zNacht isch natürlech o dr Hammer gsi. Öb Grosi’s Salat, der Lachs oder ds Schwinssteak mit Älplermaggaroni – aues het grosse Aaklang gfunge. Gemäss der wäusche Tradition isch vorem Dessert no d Chäsplatte serviert worde, u när isch si uftischet worde: d Hochzytsturte. Eifach schön isch si gsi, u fein natürlech o. Schwarzwäuder, Quark oder Kirsch – es het für jede Gschmack öppis derbi gha. U die, wo de geng no nid gnue hei übercho, die hei sech am Dessert mit Crèmeschnitte, Meringues, Fruchtsalat u no viu meh chönne bediene.

Natürlech isch o viu glachet worde. Ds Brutpaar het sini Gescht mit Theater vorgsteut, d Vättere hei ne ono wärtvoui Tipps (u nid nume Toblerone) mitgäh, der Ändu het müesse zeige, wi guet daser sini Frou kennt – u säubstverständlech hets o bi de Föteli us früechere Jahr öppis zLache gäh.

Churzum – es isch es Füürwärch a wunderbare Momänte gsi. U es Füürwärch het de dä Aabe o beschlosse. Vivent les mariés!


#

Rebecca

Ehrlech gseit erinnere ni mi nid a ne « Liebi ufe erst Blick ». I ha Ändu ir Bibelgruppe z Lausanne kenne glehrt. Was mir bi ihm gfaut, isch das mir zäme chöi diskutiere, aber o richtig zäme chöi lache… Anschinend het das glängt, für üs necher zäme z bringe ;o)

#

Ändu

I ha d Rebecca am 11. September 2012 zum erschte Mau gseh. I ha mer eso dänkt, das sig no e Nätti, e Ufgstellti, eini, womes cha lustig ha mitere. E gueti Kollegin haut. Es wär mir nid i Sinn cho, das da vilech mau meh chönnti drus wärde. Aber mängisch chunnts im Läbe angers, aus me dänkt…